બનાસકાંઠાના ધાનેરા પંથકમાં ભારે ગમગીની છવાઈ ગઈ છે. રાજસ્થાનના રણુજા રામદેવરા દર્શન કરવા ગયેલા ધાનેરાના થાવર ગામના શ્રદ્ધાળુઓને વળતી વખતે મોડી રાત્રે એક ભયાનક માર્ગ અકસ્માત નડ્યો છે. રસ્તામાં અચાનક નીલગાય આડી આવી જતાં કારચાલકે કાબૂ ગુમાવ્યો હતો અને કાર પલટી મારી ગઈ હતી. આ હૃદયદ્રાવક દુર્ઘટનામાં 3 ગુજરાતીઓના ઘટનાસ્થળે જ મોત નીપજ્યા છે.
દર્શન કરીને પરત ફરતા નડ્યો કાળ
બનાસકાંઠા જિલ્લાના ધાનેરા તાલુકાના થાવર ગામના રહેવાસીઓ રાજસ્થાનના પ્રસિદ્ધ તીર્થધામ રણુજા ખાતે બાબારી અખંડ જ્યોતના દર્શન કરવા માટે ગયા હતા. દર્શન કરીને પૂરા ઉત્સાહ સાથે જ્યારે તેઓ માદરે વતન પરત ફરી રહ્યા હતા, ત્યારે રાજસ્થાન સરહદમાં તેમની કારને કાળ આંબી ગયો હતો.
નીલગાય આડી આવતા સર્જાયો અકસ્માત
પ્રાથમિક અહેવાલો અને ચર્ચાઓ મુજબ, મોડી રાત્રે હાઈવે પર અચાનક એક નીલગાય કારની આડી ઉતરી આવી હતી. પૂરપાટ ઝડપે જતી કારની સામે અચાનક વન્યજીવ આવી જતાં ચાલકે સ્ટેયરિંગ પરથી કાબૂ ગુમાવી દીધો હતો. ક્ષણભરમાં જ કાર રોડ પરથી નીચે ઉતરીને પલટીઓ ખાઈ ગઈ હતી. અકસ્માત એટલો ભયાનક હતો કે કારનો કચ્ચરઘાણ વળી ગયો હતો અને અંદર સવાર ત્રણેય લોકોના પ્રાણ પંખેરૂ ઊડી ગયા હતા.
થાવર ગામમાં માતમ અને પોલીસ કાર્યવાહી
એક જ ગામના ત્રણ આશાસ્પદ લોકોના મોતના સમાચાર વાયુવેગે ધાનેરાના થાવર ગામમાં પહોંચતા જ આખું ગામ હિબકે ચઢ્યું છે. પરિવારોમાં કલ્પાંત મચી ગયો છે. અકસ્માતની જાણ થતાં જ ધાનેરા પોલીસ તુરંત હરકતમાં આવી છે. રાજસ્થાન પોલીસ સાથે સંકલન સાધીને ત્રણેય મૃતદેહોના પોસ્ટમોર્ટમ બાદ તેમને સન્માનપૂર્વક માદરે વતન લાવવા માટે ધાનેરા પોલીસે કાયદેસરની તજવીજ અને જરૂરી કાર્યવાહી હાથ ધરી છે.
ભક્તિના માર્ગે નીકળેલા આ શ્રદ્ધાળુઓ માટે વળતી સફર આખરી સફર સાબિત થશે તેવી કોઈએ કલ્પના પણ નહોતી કરી. હાઈવે પર અચાનક આડા ઉતરતા પશુઓ અને વન્યજીવો રાત્રિના સમયે કેટલા જોખમી સાબિત થાય છે તે આ ઘટના પરથી ફરી એકવાર સાબિત થયું છે.