તાજેતરના દિવસોમાં ભારતીય શેર બજાર (Indian Stock Market) માં ભારે ગાબડું જોવા મળ્યું છે. સતત ત્રીજા દિવસે બજારમાં મોટો ઘટાડો નોંધાયો છે, જેના કારણે રોકાણકારોમાં ચિંતા વધી છે. બપોરે લગભગ 2 વાગ્યે સેન્સેક્સ (Sensex) લગભગ 1379 પોઇન્ટ તૂટીને 74,654 આસપાસ આવી ગયો હતો, જ્યારે નિફ્ટી (Nifty) પણ લગભગ 462 પોઇન્ટ ઘટીને 23,176ના સ્તરે પહોંચી ગયો હતો.
આ અઠવાડિયામાં જ સેન્સેક્સ લગભગ 4.5% અને નિફ્ટી લગભગ 4.8% સુધી તૂટી ચૂક્યા છે. ડિસેમ્બર 2024 પછી શેર બજારમાં આવી મોટી સાપ્તાહિક ગિરાવટ પહેલી વાર જોવા મળી છે.
 |
શેર બજાર તૂટવાના 6 મોટા કારણો
1. કાચા તેલની વધતી કિંમત
શેર બજારમાં ઘટાડાનું સૌથી મોટું કારણ કાચા તેલ (Crude Oil Price) ની વધતી કિંમત છે. મધ્ય પૂર્વમાં તણાવ વધવાના કારણે બ્રેન્ટ ક્રૂડની કિંમત લગભગ 100 ડોલર પ્રતિ બેરલ સુધી પહોંચી ગઈ છે.
ભારત પોતાની જરૂરિયાતનું મોટાભાગનું તેલ આયાત કરે છે, તેથી તેલ મોંઘું થવાથી મોંઘવારી (Inflation) અને કંપનીઓના નફા બંને પર નકારાત્મક અસર પડે છે.
2. વૈશ્વિક બજારોમાં નકારાત્મક સંકેતો
દુનિયાભરના બજારોમાંથી પણ નકારાત્મક સંકેતો મળી રહ્યા છે. એશિયાના જાપાન, ચીન, દક્ષિણ કોરિયા અને હૉંગકૉંગ જેવા દેશોના શેર બજારોમાં પણ ભારે ઘટાડો નોંધાયો છે. અમેરિકન બજારમાં પણ Dow Jones 700 પોઇન્ટથી વધુ તૂટ્યો છે, જેના કારણે વિશ્વભરના રોકાણકારોમાં ડરનું વાતાવરણ સર્જાયું છે.
3. વિદેશી રોકાણકારોની ભારે વેચવાલી
વિદેશી સંસ્થાગત રોકાણકારો (FIIs) સતત ભારતીય શેર બજારમાંથી પૈસા કાઢી રહ્યા છે. માત્ર એક જ દિવસે FIIs દ્વારા લગભગ 7,000 કરોડ રૂપિયાથી વધુના શેર વેચવામાં આવ્યા હતા. માર્ચ મહિનામાં અત્યાર સુધી તેઓ લગભગ 39,000 કરોડ રૂપિયાથી વધુની વેચવાલી કરી ચૂક્યા છે, જેના કારણે બજારમાં ભારે દબાણ જોવા મળે છે.
4. રૂપિયાની ઐતિહાસિક કમજોરી
ડોલર સામે ભારતીય રૂપિયા (Indian Rupee) ઐતિહાસિક નબળા સ્તરે પહોંચી ગયો છે. રૂપિયા કમજોરીને કારણે આયાત મોંઘી થાય છે, જેના કારણે મોંઘવારી વધે છે અને બજારમાં નકારાત્મક અસર પડે છે.
5. અમેરિકન ફેડની નીતિનો ભય
દુનિયાભરના રોકાણકારોની નજર હવે US Federal Reserve ની બેઠક પર છે. જો વ્યાજ દરો લાંબા સમય સુધી ઊંચા રહે તો શેર બજારમાં રોકાણ ઓછું થાય છે અને બજારમાં ઘટાડો આવી શકે છે.
6. બેંકિંગ અને ઓટો સેક્ટરમાં ભારે વેચવાલી
આજના દિવસે ખાસ કરીને બેંકિંગ અને ઓટો સેક્ટર ના શેરોમાં ભારે ઘટાડો જોવા મળ્યો. નીફ્ટી બેંક લગભગ 1.7% સુધી તૂટ્યો હતો. સરકારી બેંકો અને પ્રાઇવેટ બેંકોના ઘણા શેરોમાં 2% થી વધુ ઘટાડો નોંધાયો છે.
નિષ્ણાતો શું કહે છે?
બજાર નિષ્ણાતોના જણાવ્યા મુજબ, નીફ્ટી 23,820ના સ્તર ઉપર ટકી શક્યો નથી, તેથી આગળ પણ થોડો ઘટાડો શક્ય છે. જો નીફ્ટી 23,670 ઉપર મજબૂતીથી બંધ નહીં થાય તો બજારમાં લાંબા ગાળાની તેજી આવવાની શક્યતા ઓછી છે.
રોકાણકારો માટે મહત્વની સલાહ
હાલના સમયમાં શેર બજારમાં વૈશ્વિક તણાવ, કાચા તેલની કિંમત અને વિદેશી રોકાણકારોની વેચવાલી જેવા ઘણા નકારાત્મક પરિબળો કામ કરી રહ્યા છે. આથી રોકાણકારોએ ઉતાવળમાં મોટું રોકાણ કરવાની બદલે બજાર સ્થિર થાય તેની રાહ જોવી વધુ સમજદારી ભર્યું રહેશે.
